Clare Agius 

​

Clare Agius hija attriċi tat-televiżjoni u ċ-ċinema, producer tat-televiżjoni u preżentatriċi ta’ diversi programmi, festivals u avvenimenti f’dawn l-aħħar għoxrin sena. Apparti minn hekk għandha passjoni kbira għall-ambjent, hija pilota u hija omm devota ta’ żewġt itfal. 

 

Clare ppreżentat uħud mill-aktar avvenimenti nazzjonali importanti, fosthom il-ftuħ tal-Valletta Capital City of Culture fl-2018 u l-Festival għall-kanzunetta Maltija għall-Ewropa.

 

Minbarra s-suċċessi tagħha lokalment, Clare rebħet l-unur għall-Aqwa Attriċi fil-Bridges International Film Festival fil-Greċja fl-2015 għall-parti li interpretat fil-feature film Malti għal udjenzi internazzjonali 'Simshar'.

 

Clare hija persuna pożittiva, dinamika u tħobb il-bilanċ bejn ix-xogħol tagħha, li għalih għandha passjoni kbira u tagħmlu b’dedikazzjoni, u l-kwalità tal-ħajja li tevolvi madwar il-familja tagħha, l-ivjaġġar, in-natura u l-baħar.

 

 

Keith Demicoli

 

Keith Demicoli huwa missier, xandar u preżentatur b’kariżma u ħiliet naturali ħafna. Rebbieħ ta’ bosta unuri relatati max-xandir u l-ġurnaliżmu, fosthom darbtejn l-aqwa qarrej tal-aħbarijiet, li sa April 2021 tant kien sinonimu magħhom wara li qara aktar minn 2,000 bulletin tal-aħbarijiet ta’ TVM. Twieled fis-17 ta’ Frar, 1982. Tgħammed il-Birgu, trabba Ħaż-Żabbar u qatta’ t-tfulija tiegħu jservi bħala abbati fil-Knisja ta’ Santa Liberata l-Kalkara, jilgħab il-football ma’ Żabbar St Patrick u joħlom li jsir footballer jew kummentatur tal-football professjonanali. Ta’ 12-il sena beda jikteb fil-gazzetta u ta’ 16-il sena beda jieħu sehem fi programmi tal-isport fuq ir-radju u ftit wara beda jirrapporta l-logħbiet tal-waterpolo. Gradwa fit-teknoloġija tal-informatika mill-MCAST u aktar tard b’baċellerat u Masters fl-Istudji Ewropej mill-Università ta’ Malta. Studja l-ġurnaliżmu mxandar fl-Akkademja tal-BBC f’Londra u segwa programm intensiv ta’ taħriġ fl-Istati Uniti. Jekk ma jkunx qed jippreżenta, jirrekordja jew jikteb, x’aktarx li se ssibu jagħmel xogħol volontarju ma’ Special Olympics Malta, jaqra lit-tfal jew jiġri xi nofs maratona. Jemmen li l-ħajja hija qasira wisq u għalhekk irridu ngħixuha b’attitudni pożittiva u realistika.

 

 

Moira Delia

 

Moira Delia, magħrufa bħala l-vuċi tal-annimali f’Malta, hija preżentatriċi kif ukoll producer li ilha taħdem fil-qasam tax-xandir għal dawn l-aħħar 30 sena. Moira għandha 50 sena u ilha mal-partner tagħha Nikki Laferla għal dawn l-aħħar 22 sena.

 

Hija kienet il-preżentatriċi tal-ewwel Junior Eurovision li qatt sar Malta fl-2014 u ppreżentat ukoll il-ftuħ tal-Valletta 2018 European Capital of Culture.

 

Il-popolarità ta’ Moira Delia bdiet ta’ età żgħira, meta ta’ 28 sena, Moira kienet iċ-champion ta’ Malta fil-Fencing – titlu li damet tiddefendi għal bosta snin, u fil-fatt irrappreżentat lil Malta darbtejn fil-Kampjonati tad-Dinja.

 

L-annimali kif ukoll l-isports kienu u jibqgħu jagħmlu lil Moira min hi illum - bniedma assertiva, pożittiva, b’qalb kbira u li ma taqta’ qalbha qatt.

 

L-islogan favorit ta’ Moira hu 'adoptdontshop' - Moira temmen li jekk wieħed verament iħobb lill-annimali, għandu jadotta xi wieħed mill-2000 kelb u qattus li għandna ġox-shelters f’pajjiżna.